jaihomanthra

హాకిన్స్‌ ప్రకారం మనం గత జీవితాన్ని ఎక్కడైతే విడిచి పెట్టామో అదే స్థాయికి నిర్ధారింపబడిన ఎరుకతో జీవితంలోకి ప్రవేశిస్తం. చాలామంది తమ జీవితంలో కేవలం ఐదు పాయింట్లను మాత్రమే అధిగమించ గలుగుతరు. ఇదే గనుక నిజమైతే మనం జీవితంలో చాలావరకు ఒక నిర్దిష్ట స్థాయిలోనే అట్లనే ఉండిపోతం. నా జీవితంలో నాకు సన్నిహితంగా తెలిసిన వ్యక్తుల అనుభవాల ప్రకారం బహుశా ఇది ఒక ఖచ్చితత్వం కలిగిన ప్రకటన అయితది. స్వీయ చైతన్య లక్ష్యంగా లేని వాళ్ళలో అతి తక్కువ మంది వ్యక్తులు మాత్రమే చైతన్యానికి సంబంధించిన ఉన్నత స్థానాలకు వేగంగా పోగలిగిన్రు. ఈ కొలమానంలో మనం ముఖ్యంగా గమనించాల్సిన విషయాల్లో ఒకటి 200 మరియు రెండవది 500 యొక్క సరిహద్దులు స్థాయిలు. 200 కన్నా తక్కువ ఎరుక స్థాయి ప్రాతినిధ్యం వహించేది ‘‘ఒత్తిడి’’ ఈ రేంజిలో ఉండెటోల్లు ఖాలి బతకడం కోసమే బతకడమన్నట్టు బతుకుతుంటరు. ఎట్లోఅట్ల బతుకీడుస్తరు తప్ప జీవించాలన్న ఆకాంక్ష మనసులోతుల్ల ఉండదీల్లకు. కనీస నైతిక నిబద్ధత లేకుండ గడిపేస్తరట్ల. నిత్యం తమ సొంత సమస్యల్లో కొట్టుమిట్టాడుతూ బయటకు తామెట్ల కనిపిస్తన్నమో, ఎట్ల ప్రవర్తిస్తున్నమో అన్న సోయి కూడ లేకుండ ఉంటరు. వాల్ల అంతర్గత ఆలోచనలు భ్రమలు, భ్రాంతులతో నిండి ఉంటయి. వాల్లెప్పుడూ భావోద్వేగాలు, అవమానాలు, అపరాథభావన, స్వీయ సానుభూతి, ఉదాసీనత, విచారం, భయం, కోరికలు, కోపం మరియు గర్వంతో కూడిన ఆలోచనల మీదే దృష్టి పెడుతూంటరు. వాల్లు తమ చైతన్య స్థాయి నుండి బయటపడి వాల్ల ఉద్వేగాలకు అతీతమైన అవగాహనా స్థాయికి చేరుకోలేరు. 200 స్థాయి కన్నా తక్కువ చైతన్యం ఉండోటోల్లు జీవితంలో అన్నీ పొందుతరు తప్ప అదే స్థాయిలో తిరిగి ఇవ్వలేరు. వాల్లెప్పుడూ బాధిత మనస్తత్వంలోనే ఉంటరు. తమ బలహీనతల నుండి బయటకొచ్చి తమ జీవిత సమస్యలకు మూల కారణమేంటో తెలుసుకోలేరు. వీల్లు తమకూ అలాగే సమాజానికీ కూడా హానికరంగా ఉంటరు. ఐతే 200 స్థాయికి చైతన్యం పెరిగే కొద్దీ నిర్మాణాత్మక పద్ధతిలో శక్తిని ప్రదర్శించగల్గుతరు. సరిగ్గా 200 స్థాయి ఇటు విధ్వంసక ప్రవృత్తి నుంచి ఒక జీవితాన్ని తీర్చిదిద్దే సకారాత్మక నిర్మాణ శక్తిగా ఎదగనీకి మలుపైతది. బాధిత మనస్తత్వం తక్కువ స్థాయిల్లో కనిపిస్తూ 125, కోరిక స్థాయి దాటే కొద్దీ మరింతగా నిందించే స్థాయికి చేరుకుంటరు. ఈల్లు జీవితంలో ఎప్పుడూ తప్పులు తాము చేస్తరు బయటోల్లను నిందిస్తరు. తమ బాధ్యతలు గానీ పరిస్థితులు గానీ గుర్తించనే గుర్తించరు. వాల్లెప్పుడూ బాధితులుగా ఉండటం కోసం తమ శక్తిని ఒదిలేసుకుంటరు ఎందుకంటే సమస్యకు మూలకారణం ఆడే ఉంటది కాబట్టి. నిజమైన శక్తి మనిషిని తీర్చిదిద్దుతది. బాధిత మనస్తత్వం ఉన్నోల్లు బాధితులుగానే ఉండిపోతరు. ఆల్లెప్పుడు ఎదుటోల్ల సానుభూతి కోసం, బాధిత మనస్తత్వానికి ఎదుటోల్లు మద్దతు ఇవ్వాలని కోరుకుంటరు. ఉదాహరణకు మంచుపై నడుస్తూ కాలుజారిపడితే ఎవరిపై కోర్టు కేసు వెయ్యాలాని ఆలోచిస్తరు తప్ప తాము సరిగ్గా నడవలేనందుకు పడ్డమనుకోరు. ఆల్లు ఆ మంచు ఉన్నచోట ఇంటోల్లదే తప్పు అనుకుంటరు. ఆల్లు పడనీకి కారణం వేరేవాల్లనుకుంటరు తప్ప తాము కల్లు మూసుకుని నడిచామన్నది ఎప్పటికి గుర్తించరు. ఇంకొక ఉదాహరణ తీసుకుంటే వైఫల్యం చెందిన వైవాహిక జీవితాల్లో తప్పంతా నీదే అంటే నీదే అనుకుంటరు తప్ప తమ తప్పులకు బాధ్యతే వహించరు. వాల్లలో వాల్లు సమస్యలకు ఏవిధమైన పరిష్కారమూ పొందలేరు. వాల్ల సమస్యలు తీరకుండా అట్లే ఉంటయి. 200 దిగువన ఉండే అన్ని స్థాయిలు ఒక దానికి మరొకటి మద్దతిచ్చుకుంటయి. ఒకదానిపై మరొకటి ఆధారపడి ఉంటది. ఎవరైనా మానసికంగా దిగులైనప్పుడు కింది స్థాయిల కలయికగా ఉంటది. అదే 200 స్థాయి ఎక్కువ ఉంటే శక్తిని కలిగి ఉంటయి. 200 కన్నా ఎక్కువ ఉండే చైతన్య స్థాయిలు ప్రాతినిధ్యం వహించేది ‘శక్తి’ బాధ్యతల గురించి మాట్లాడే స్థాయిని దాటి దైర్యం వైపు చేరుకుంటరు ఈ స్థాయిలో ఉండెటోల్లు. సమస్యలను ఎదుర్కొని వాటిని తమకు తామే పరిష్కరించుకొనే స్వయం సాధికారిక స్థితికి చేరుకుంటరు. ఈ స్థాయిని దాటేకొద్దీ అవకాశాలను గురిస్తూ తమ లక్ష్యాలను నెరువేర్చుకోనికి ఇతరుల సహకారం పొందుతరు. ఇటువంటి స్థాయిలు బాహ్య ప్రపంచ అవగాహనను పెంచి ఆల్లను ఎంతో శక్తివంతులను చేస్తవి. ఇందుకు ఒక ఉదాహరణ చెప్పాలంటే మహాత్మాగాంధీ తన ప్రేమ, అహింసల అపార శక్తి ద్వారా బ్రిటీషోల్లను ఓడగొట్టిండు తప్ప బలవంతం చేసికాదు. ఈ ప్రక్రియ ద్వారా ఆయన దేశానికి స్వాతంత్య్రం తెచ్చిండు. శక్తి మరియు ఒత్తిడిల మధ్య సాధారణ వ్యత్యాసం ఒత్తిడి ఉపయోగిస్తే అందుకు తగ్గట్టు వ్యతిరేక దిశ నుండి మల్ల ఒత్తిడి ఎదురైతది కాబట్టి దీని ప్రభావం పరిమితంగ ఉంటది. ఎందుకంటె అటు ఇటు కదలనీకి దీనికి చలనం అవసరం. అదే సమయంలో శక్తి స్థిరంగా ఉంటూ తనంతట తాను దేన్నైనా ఎదుర్కోగల్గుతది. ఒత్తిడి ఫలితాలివ్వాలంటె దానిచేత మనం పనిచేయించాలె. అదే శక్తైతె గురుత్వాకర్షణ శక్తి లెక్క స్థిరంగ ఉంటూ తనంతట తాను ఎదుటివాటిపై ప్రభావం చూపుతది. శక్తికి ఓ అర్ధం ఉంటది. ఓ సిద్ధాంతముంటది. ఇది జీవితానికి సానుకూలంగా ఉపయోగపడే విధంగా తనను తాను మార్చుకుంటది. శక్తి అనేది స్వాభావికంగా ఎంతో గొప్పగుంటది. సహకార స్వభావం కలిగి ఉంటది. ఇది జీవితాన్ని పరిపూర్ణం చేస్తూ వ్యక్తి యొక్క గౌరవాన్ని పెంచుతది. ఒత్తిడి ఎప్పుడూ అపరిపూర్ణంగా ఉంటూ అస్థిరత కలిగుంటది. కాబట్టి దానికి బయటనుంచి శక్తి అందిస్తె తప్ప తనంతటా తానుగా పనిచేయదు. శక్తి తనంతట తాను స్వయం సిద్ధంగా ప్రకాశిస్తూ బయటనుండి వేరే శక్తి అందించాల్సిన పనిలేకుండా సంపూర్ణంగా ఉంటది. శక్తి కరుణపూరిత స్వభావం కలిగి ఉండి మనపట్లా, ప్రపంచం పట్లా సానుకూల వైఖరి అందిస్తూ ఉంటది. ఇది జీవితానికి శక్తి ఇస్తూంది. ఒత్తిడి జీవితాన్నుంచి శక్తిని లాక్కుంటది. ఒత్తిడి అన్నది వెంట వెంటనే తీర్పులిచ్చె మనస్తత్వం కలిగి ఉండడమె కాక ఇది మనపట్ల ప్రపంచంపట్ల వ్యతిరేక వైఖరి కలిగి ఉంటది. ఒత్తిడి ఉపయోగించడం మనుషుల్ని విడదీస్తూ గెలుపోటములకు కారణం ఐతది కాబట్టి ఇది శతృవులను సృష్టిస్తది. ఆల్ల నుండి తప్పించుకోనికి ఎల్లప్పుడు మనల్ని మనం రక్షించుకుంటూ ఉండాల్సిన అవసరముంటది. స్థిరత్వం లేని లక్ష్యాల వెంట పరిగెత్తనీకి ఒత్తిడి ఉపయోగించబడ్తది కాబట్టి విజయం సాధించినప్పటికి ఏదో తెలీని వెలితి కనిపిస్త ఉంటది. శక్తి అనేది జీవితం యొక్క సూత్రాలకు అనుగుణంగా పనిచేస్తూ జీవితంలోని అన్ని పార్శ్వాల్లోనూ మద్దతుగా నిలుస్తది. కాబట్టి ఇది లోతైన అంతరార్ధాలు కలిగి ఉంటూ మనిషులకి అంతులేని నిరంతర ప్రేరణ అందిస్తూ ఉంటది. శక్తి అనేది మనిషిలోని సామర్ధ్యాలను నింపితే ఒత్తిడి అనేది బలహీనుణ్ణి చేస్తుంది అనే విషయాన్ని గుర్తుపెట్టుకోవలసి ఉంటది. ప్రేమ, కరుణ, కృతజ్ఞతాభావం మరియు శాంతి వంటి లక్షణాలు పైకి లొంగుబాటుగా లేదా బలహీనతగా కనిపించినప్పటికీ ఇవి అసాధారణ శక్తి వంతునిగా మనిషిని తీర్చిదిద్దుతయి. ద్వేషం, పగ, తొందరపాటు తీర్పు, ఖండిరచి మాట్లాడడం లాంటివి తప్పనిసరిగా మనిషిని బలహీనుడి లెక్క మార్చేస్తయి. బలహీనులు చిట్టచివరకు తమ బలహీనతల ద్వారా పతనం చెందుతరు. శక్తి చివరివరకు బలీయంగా అట్లనే ఉంటది. సత్యవంతమైన సూత్రాలకు నిలబడిన చరిత్రలో గొప్పవారిగా పేరొందిన వాల్లంతా తమకు శక్తి బయటనుంచి అందిందని చెప్పుకొస్తరు. చరిత్రలో అత్యంత నీచమైన వ్యక్తులు వారియొక్క వ్యక్తిగత బలహీనతల కారణంగా ఊహించనలవి గాని బాధలు వడ్డరు. 500 మరియు అంతకు మించిన చైతన్యము యొక్క స్థాయిలు 500 స్థాయి చైతన్యము దాటితే ఆల్లు ఇతరుల బాగుకోసమే ఆలోచిస్తరు, పనిచేస్తరు. ఆల్లకు అహంకారం అనేటిది ఉండదు. లేదా అహంకార స్థితిని అధిగమించినోల్లయి ఉంటరు. ఒకవ్యక్తి ఈ స్థాయికి చేరుకున్నడంటె అంతకన్న చిన్న స్థాయికి ఎప్పుడు ఒప్పుకోడు. కాబట్టి ఆల్లెప్పుడు ఉన్నతమైన స్థానాల్లో ఉంటరు. ఈ స్థాయిలో చైతన్యంలో ఒక గొప్ప మార్పు మొదలైతది. ఈ స్థితిలో తమతో ప్రతి ఒక్కరిని సమిష్టిగా చూడడం మొదలుపెడ్తరు. ఆల్లకు జీవితమంటె సొంత కోర్కెలు సాధించుకోవడం కాదు. జీవిత పరమార్ధం ఇతరులకు సాయం చేయడం మానవాళి అభ్యున్నతికి పాటుపడ్డంగా భావిస్తరు. 540 ఎరుక స్థాయికి మించినోల్లు జ్ఞానోదయం గురించి పరితపిస్తూ ఆధ్యాత్మిక అన్వేషణ కొనసాగిస్తరు. అది సాధించే దిశగా వాల్లు చేసే కృషి సమస్త మానవాళి యొక్క చైతన్యాన్ని పెంచుతుంది. 400 స్థాయి (కారణం) మేథస్సు ఉపయోగిస్తూ వాస్తవాల అధారంగా తర్కంతో 500 మరియు అంతకంటే ఎక్కువ ఆధ్యాత్మిక స్థాయిని చేరుకోనీకి అడ్డుపడ్త ఉంటది. 540 కి మించిన స్థాయి ఆధ్యాత్మిక మార్గంలో ప్రయాణిస్తూ జ్ఞానోదయాన్ని పొందుతది. జ్ఞానోదయం పొందిన వ్యక్తికి మానవత్వానికి సంబంధించిన అపారమైన అవగాహన కలుగుతది. మేథావులు తమ హేతుబద్ధత, తర్కాల కారణంగా 500 స్థాయి మించి ఆధ్యాత్మిక స్థితికి ఎప్పటికీ చేరుకోలేరు. ఎరుక స్థాయి 540 మించినపుడు విశ్వాస ఆధారిత ఆధ్యాత్మిక సాధన అవసరం పడుతుంది. అందుకే జ్ఞానోదయాన్ని సర్వసాధారణంగా ఆధ్యాత్మిక జ్ఞానోదయంగా పిలుస్తరు. మేథావులు వైజ్ఞానిక దృష్టి నుండి బయటపడలేక 500 కంటే తక్కువ స్థాయిలోనే ఎల్లప్పుడూ ఉంటరు. చైతన్యం యొక్క స్థాయిలు -- కొలమానం మరో ముఖ్యమైన విషయం ఏమిటంటే ఇది 1 నుండి 1000 వరకు ఉండే పట్టికల ఆధారిత కొలమానం. అంటే 300 స్థాయి అంటే 150 స్థాయికి సరిగ్గా రెట్టింపు అనుకోకూడదు. పదోశక్తికి 300 గా ఉంటుంది. అందువల్ల కొన్ని పాయింట్లు పెరిగినప్పుడు శక్తిలో గణనీయమైన పెరుగుదల కనిపిస్తది. సగటు వ్యక్తి తన జీవితకాలంలో 5 పాయింట్లకు మాత్రమే ఎదుగుతారని కొన్ని సార్లు వెనక్కి తగ్గుతరని డా.హాకిన్స్‌ చెప్తడు. కొలమాని పైకి కదులుతున్నప్పుడు శక్తి యొక్క పెరుగుదల అసాధారణ రీతిలో ఉంటది. వివిధ స్థాయిల్లోని వ్యక్తులకు, వ్యక్తి స్థాయిలకు విలోమ సంబంధాన్ని గమనిస్తే ఆసక్తికరంగా ఉంటది. ఈ కొలమానం పైభాగంలో చాలా తక్కువమంది ఉన్నారు. ఈ కొలమానం క్రిందకి దిగే కొద్దీ జనాల సంఖ్య పెరుగుతూ ఉంటది. ప్రపంచ జనాభాలో అత్యధికులు దిగువ స్థాయిలో బతుకుతున్నరు. కొలమానం పైకి పోయే వరకు మనుషుల సంఖ్య తగ్గిపోతూ ఉంటది. ఈ విషయాన్ని గమనిస్తే ఎంతో ఆసక్తికరంగా ఉంటది. చైతన్య స్థాయిల యొక్క శక్తివంతమైన మరియు అయస్కాంత లక్షణాలు ఈ స్థాయిలో ఇనుము అయస్కాంతాన్ని చేరుకునే విధమైన ‘‘శక్తి క్షేత్రాలు’’ లేదా ‘‘ఆకర్షక క్షేత్రాలు’’గా భావించవచ్చు. మనం కొన్ని చైతన్య స్థాయిలకు చేరుకున్నప్పుడు లేదా ఆకర్షించబడినప్పుడు మనలోని శక్తి ఆ స్థాయికి అనుగుణంగా తమను తాను సవరించుకుంటది. ఈ స్థాయిలు దేనికవి స్వీయ శక్తిపూరితమై ఉంటాయి. మన ఆలోచనలో కొత్త తరహా మార్పు లేదా విధానాల్లో సవరింపులు చేసుకున్నప్పుడు వేరే చైతన్య స్థాయి శక్తి క్షేత్రాల వైపు ఆకర్షింపబడతాము. మన ఆలోచనా విధానంలోని మార్పు తక్కువ స్థాయిలో ఉన్నప్పుడు మరొక రకం చైతన్య స్థాయికి అనుగుణంగా నమ్మకాల వ్యవస్థను పెంపొందించుకుంటము. స్థాయిలు పెరిగేకొద్దీ అవి మరింత శక్తిని కలిగి ఉంటయి. ఒక ఉదాహరణకు అవమానం (20) మరియు అపరాధభావం(30)తో వ్యక్తులు తమను తాము ద్వేషించుకుంటూ ఉంటరు. వారు తమను తామే నాశనం చేసుకుంటారు. వాల్లు తదుపరి స్థాయి అయిన ఉదాసీనత(50)కు చేరుకున్నట్లయితే దాదాపుగా జీవితం పట్ల ప్రతిస్పందన లేనివారైనప్పటికీ స్వీయ విధ్వంసం వైపు పోరు. వాల్లు ఏడ్వడం మొదలువెడ్తె దుఃఖం (75) స్థాయికి చేరుకుంటరు. ఈ స్థితి ఉదాసీనతకు పై మెట్టుగా ఉంటది. అదేవిధంగా భయం(100) స్థాయికి చేరుకున్న వ్యక్తులు భయకంపితులై ఉంటరు. వారి భయం భవిష్యత్తును కాపాడుకునే ఆకాంక్షను వ్యక్తపరుస్తది. అదేవిధంగా కోరిక (125) స్థాయికి చేరుకున్నట్లయితే తమను తాము కాపాడుకునే విషయంలో రిస్కు తీసుకోడానికి ప్రయత్నిస్తరు. భయాన్ని కోరిక ద్వారా అధిగమిస్తరు. తమకు కావల్సింది పొందాలన్న తపన మొదలైతది. కాబట్టి ప్రతిస్థాయి వారు ఎటువైపు వెళ్తున్నారు అనే మార్గాన్ని బట్టి మెరుగ్గా లేదా అధ్వానంగా కనిపిస్తది. మీరు వివిధ స్థాయిల శక్తికి ఏవిధంగా ఆకర్షింపబడతారు లేదా ఆ స్థాయి యొక్క లక్షణాలతో ఏ విధంగా ఎలైన్‌ అయితరో తెలుసుకునేందుకు ఈ ఉదాహరణలను గమనించండి. మీరు ప్రతికూల మరియు బాధిత మనస్తత్వం వ్యక్తి సమక్షంలో ఉన్నప్పుడు మీరు పుకార్లు, తీర్పు, ద్వేషం, ధిక్కారం, విమర్శలు, కోపం మొదలైన వాటి వైపు ‘‘లాగబడవచ్చు’’ లేదా ‘‘ఆకర్షింపబడవచ్చు.’’ అదేవిధంగా ఉన్నత స్థాయిలో ఉండే వ్యక్తి సమక్షంలో మీరు ఉన్నప్పుడు కరుణ, ప్రోత్సాహం, ఉత్సాహం, విశ్వాసం, అంగీకారం, క్షమాపణ, ప్రేమ మొదలైన ఉన్నత శక్తులలోకి ఆకర్షితులౌతరు. మీరు బాగా గుర్తించుకోవాల్సిన విషయమేమంటె మీరు విభిన్న శక్తి క్షేత్రాల ద్వారా ప్రభావితమైతరు. మిమ్మల్ని చుట్టుముట్టేవి, మీరు ఆలోచించేవి, లేదా మీరు మనసు లోపలకి స్వీకరించి అనుమతించేవి మీ చైతన్య స్పృహపై ప్రభావం చూపుతయి. క్లుప్తంగా చెప్పాలంటే ‘‘ఒకే జాతికి చెందిన పక్షులు ఒకే గూటికి చేరతయి’’, ‘‘మీరెలాంటి వాల్లో మీ స్నేహితులను చూసి చెప్పచ్చన్నట్టు’’. అందువల్ల ప్రేమ, కరుణ, ప్రోత్సాహం, సహకారాలతో నిండిన ఉన్నతస్థాయి బృందాలతో ఉన్నప్పుడు అపారమైన శక్తి కలిగిఉంటరు. ‘‘AA’’ ఆధ్యాత్మిక బృందాలు ఉన్నతస్థాయి సమగ్రతతో కూడి ఉంటయి. ఈ విషయంపై అవగాహన పెరిగేకొద్ది ఆకర్షక క్షేత్రాలు మనపై వేసే ప్రభావాన్ని తెలుసుకోగల్గుతము. ఉన్నత స్థాయి చైతన్యం కల్గిన వ్యక్తులతో కేవలం కొద్దిసేపు మాట్లాడినప్పటికి అది జీవితంపై అపారమైన ప్రభావం చూపిస్తది. కృష్ణుడు, జీసస్‌ మరియు బుద్ధుడు లాంటి గొప్పవారు మరియు జ్ఞానోదయం పొందిన వ్యక్తుల బోధనలు అధ్యయనం చేయడం ద్వారా గొప్ప శక్తిని పొందగలము. హాకిన్స్‌ ప్రకారం జీసస్‌, బుద్ధుడు, కృష్ణుడుల చైతన్య స్థాయి 1000 ఉంటుందని లెక్కగట్టిన్రు. ఈ మహావతారాలు మానవ చైతన్యంపై కలిగిఉన్న అపారమైన శక్తి గురించి ఆలోచించండి. ఆ ప్రభావాలు నేటికీ అనుభవంలో ఉన్నయి. 1000 స్థాయి వద్ద ఉన్న అవతారులు వ్యక్తులుగా అంతగా కనిపించరు కానీ ఒక చైతన్యానికి సంబంధించిన నమూనాల్లా మారిన్రు. కృష్ణ తత్త్వం, క్రీస్తు స్పృహ, బుద్ధ స్వభావం ఇటువంటి నమూనాలకు ఉదాహరణలుగా నిలుస్తయి. ఎవరైనా ఈ స్థాయిని పెంచుకోవాలంటే ఉన్నతస్థాయి ఆలోచనా రీతులను అలవరచుకోవలసి ఉంటది. ప్రేమ, కరుణ, కృతజ్ఞత, శాంతి లాంటి లక్షణాలు చైతన్యం యొక్క ఉన్నత సూత్రాలు. ఎవరైన ఈ సూత్రానికి వ్యతిరేకంగా నడుచుకున్నట్లైతే చైతన్య స్థాయిల్లో తక్కువ స్థానానికి చేరుకుంటరు. కోపం, గాలివార్తలు, ద్వేషం, తీర్పరితనం వంటి భావోద్వేగాలు కలిగిన వాళ్ళు తక్కువ ఎరుక స్థాయివైపు ఆకర్షింపబడతరు. అలాగే మనకు మనం ఉన్నత లక్షణాలను అలవర్చుకున్నప్పుడు పై స్థాయిలకు చేరుకుంటము. మనం వ్యక్తులను చైతన్య స్థాయిలను క్షుణ్ణంగా పరిశీలించినట్లయితే ఆయా వ్యక్తులు తమ జీవితాల్లోని వివిధ అంశాల్లో వివిధ స్థాయిల్లో ఉండవచ్చని గమనించండి. ఇది ఆయా వ్యక్తుల యొక్క మొత్తం చైతన్యం యొక్క సగటు వారి మొత్తంగా ఏ స్థాయిలో ఉన్నారో నిర్ణయిస్తుంది. ఉదాహరణకు ఎవరైనా కోరిక, కోపం మరియు గర్వాల మధ్య ఉండవచ్చు. దీని కారణంగా వారి సగటు స్థాయి కోపం కావచ్చు. ఎవరైనా తమ జీవితంలో వివిధ సమయాల్లో, వివిధ పరిస్థితులతో సంబంధం కలిగి ఉండడం అసాధారణమైతె కాదు. కానీ వాటిలో ఒకటి మన ఎరుకపై ఆధిపత్యం చెలాయిస్తూ ఉంటుంది. స్థాయి వివరణలు: చైతన్య స్థాయి 20: అవమానం అవమానం ఆత్మహత్యకు దారితీస్తుంది లేదా జీవితాన్ని కొనసాగించాలన్న కోరిక లేకుండా చేస్తది. అవమానానికి గురైన వాళ్లు పరువు పోగొట్టుకుని మొహం చెల్లని వారుగా తమను తాము భావిస్తరు. వాల్లు పదిమంది ఎదుట రాలేక దాక్కుందమనుకుంటరు. సిగ్గుతో తనలో తాను కుచించుకుపోతు ఉంటరు. సమాజంలో తల తీసేసినట్టు బావిస్తరు. ఒక విధమైన బహిష్కృతుడైన భావన మరణాన్ని ఒక పరిష్కారం ఎంచుకునే విధంగా దారితీస్తది. సాధారణంగా అవమానం అనేది భావోద్వేగ మరియు మానసిక ఆరోగ్యానికి వినాశకరంగా మారుతది మరియు తరచు శారీరక అనారోగ్యంగా లేక మరణంగా వ్యక్తమవుతది. ఇది తనపట్ల లేదా ఇతరుల పట్ల కూడా వ్యక్తమైతది. చైతన్య స్థాయి 30: అపరాధభావన అపరాధభావం అనేది క్షమార్హం కాని భావోద్వేగంగా రూపుదిద్దుకుంటది. ఇది అంతర్ముఖంగా ఉంటది, లేకుంటే బహిరంగంగా కనిపిస్తది. వీల్లు శిక్షకు గురైతమని చూస్తుంటరు, లేదా ఎవరినైనా శిక్షించాలని బలీయమైన భావం కల్గి ఉంటరు. తమ స్వీయ అపరాధ మనఃసాక్షిని సంతృప్తి పరుచుకోనికి సమాజాలు తరచుగా బహిరంగ శిక్షను ఉపయోగించుకుంటయి. అపరాధ భావం ఆవేశాన్ని రేకెత్తిస్తుంది. చంపడంలో ఇది వ్యక్తమయితది. ఇది తరచుగా స్వీయ తిరస్కరణ, పశ్చాత్తాపం, చెడు అనుభూతి మరియు స్వయం విధ్వంసానికి దారితీస్తది. పైకి తెలియకుండా అంతర్గతంగా దాగిఉన్న అపరాధ భావన సైకోసొమాటిక్‌ వంటి తీవ్ర మానసిక వ్యాధులకు కారణమయితది. చాలామంది వ్యక్తులు ఏదో ఒకవిధమైన స్థాయి కల్గిన అపరాధ భావనలను జీవితాంతం కలిగి ఉంటరు. అపరాధ భావన కలిగిన వారిని వేరొకరు అలుసుగా తీసుకొని దోచుకుంటరు, కంట్రోల్‌ చేయనికి ప్రయత్నిస్తరు. చైతన్య స్థాయి 50: ఉదాసీనత ఉదాసీనత అన్నది పేదరికం, నిరాశ మరియు నిస్సాహయతలతో కూడుకున్నది అయి ఉంటది. ఇది ఇతరుల వద్ద జాలి పొందే స్థాయి. వీరిలో చైతన్య శక్తి స్థాయి ఎంత తక్కువగా ఉంటుందంటే సహాయం అందుబాటులో ఉన్నప్పటికి దాన్ని అందుకోలేకపోతరు. వీరిలో ఆశ్రయంలేని వాల్లు, ఒంటరిగా నివసించేవాల్లు, దీర్ఘకాలిక వ్యాధులతో బాధపడుతున్న వృద్ధులు ఉంటరు. ఆశ అన్నది ఒదిలేసిన స్థితిగా ఉదాసీనతను అభివర్ణించవచ్చు. హాకిన్స్‌ అంచనా ప్రకారం ప్రపంచ జనాభాలో దాదాపు మూడిరట ఒక వంతు మంది ఈ స్థాయిలో లేదా అంతకన్న తక్కువ స్థాయిలో జీవిస్తున్నరు. చైతన్య స్థాయి 75: దుఃఖం ఈ స్థాయి గతం యొక్క విచారం, నష్టం, వియోగం మరియు పశ్చాత్తాపం లాంటి లక్షణాలు కలిగి ఉంటది. జీవితం మొదట్లో కలిగిన ఒక పెద్ద నష్టం వల్ల దుఃఖం మరియు విచారం జీవిత పర్యవసానాలుగా భావించే లెక్క మారుతయి. ఈ దశలో ఉన్నవారు తమ దుఃఖాన్ని ప్రపంచానికి వ్యక్తపరుస్తు అన్ని విషయాలను విచార కోణంలోనే చూస్తరు. ఇది అలవాటుగా నష్టపోయేవాల్లు మరియు జూదబలహీనత బాగా ముదిరినోల్ల స్థాయి. వారు తమ వైఫల్యాలను అలాగే ఉద్యోగాలు, డబ్బు, స్నేహితులు, ఆరోగ్యం, కుటుంబం, అవకాశాలను కోల్పోవడం తమ జీవనశైలిలో ఓ భాగంగా అంగీకరించే స్థాయికి వచ్చేస్త్తరు. తమకు ఎంతో విలువైన, అపురూపమైనయి కోల్పోయినప్పుడు వాటికి మరో ప్రత్యామ్నాయం ఉండనే ఉండదని భావించడం దుఃఖం తాలూక లక్షణాల్లో ఒకటైతది. అటువంటి నష్టాలు ఎదుర్కొన్నప్పుడు అవి వారిని తీవ్రమైన కృంగుబాటుకి గురిచేస్తవి, మరణానికి సైతం దారితీసేలా చేస్తవి. అయితే దుఃఖం అనేది ఉదాసీనతకు మించిన శక్తి స్థాయి కాబట్టి ఉదాసీనత స్థితి దాటి దుఃఖాన్ని అనుభవించడం ప్రారంభించినాక వారు అదే స్థాయిలో కొనసాగుతున్నరు. చైతన్య స్థాయి 100 : భయం భయం అనేది దాదాపుగా అందరి బాహ్య అంతర్గత చైతన్యాల్లో ఉండేటిదే. దుఃఖం అనేది గతం పై కేంద్రీకృతమై ఉన్నప్పుడు భవిష్యత్తు గురించి భయం ఉంటది. మరణం లేదా ఆత్మహత్యకు దారితీసే దిగువ స్థాయి నుంచి ఈ స్థాయి ఎంతో దూరంగా ఉంటుంది. భయం మన యొక్క శ్రేయస్సు, భద్రతలకు సంబంధించిన ఆందోళనలను వ్యక్తపరుస్తది. కాబట్టి ఇది తమ జీవితాన్ని కాపాడుకోవాలనుకునే భావనగా వ్యక్తమైతది. భయమనే భావన అడ్వర్టైజింగ్‌, మీడియా, రాజకీయాల్లో ఇతరులను దోచుకోవడానికి విరివిగా వాడబడ్తవి. ఒక వ్యక్తి స్వభావంలో భయమన్నది ప్రధానంగా ఉంటే వారు అస్థిర మనస్తత్వం, అసూయ వంటి న్యూరోసిస్‌ పరిస్థితిలో ఉంటరు. భయంతో ఉన్నప్పుడు ఎదగడం కష్టమై అది వారి అంతర్గత నిరోధాలకు దారితీస్తది. భయంతో ఉన్నవాళ్ళు తమ స్థితిని అధిగమించడం ద్వారా మరింత ఎగువ స్థాయికి చేరుకుంటరు. చాలా మంది వ్యక్తులు భయాన్ని ఆధారంగా తమ జీవితాలను నిర్మించుకోవడం వల్ల భయం కూడా ఎదగడానికి ఒక శక్తివంతమైన ప్రేరణ అందించడం ఓ ఆసక్తికరమైన విషయం. మరణభయం లేదా వ్యాధిగ్రస్త జీవితం తాలూకు భయం జనాలను ఆరోగ్యకరమైన జీవన విధానాలకు ప్రేరేపిస్తది. అవసరమైన డబ్బు ఉంటదో లేదో అన్న భయం మనుషులను డబ్బు పట్ల బాధ్యతగా ఉంటూ వారి రిటైర్‌మెంట్‌ ఖర్చులకోసం పైసలు దాచుకునేటట్టు చేస్తది. అలాగే భయం విధ్వంసకరం కూడా. రిలేషన్‌షిప్‌లో కోల్పోతాము అన్న భయం తీవ్రమైన అసూయకు దారితీస్తది. మనం భయాలను ఎదుర్కోడానికి ఇష్టంగా లేనప్పుడు భయం మన జీవితానుభవాన్ని పరిమితం చేసేస్తది. మన భయాల గురించి ఆత్మపరిశీలన చేసుకోవడం వల్ల అది మన గురించి అట్లే అది మనను ఎట్లా ప్రేరేపిస్తున్నదో తెలుస్తది. చైతన్య స్థాయి 125 : కోరిక ఈ స్థాయి భౌతికవాదం మరియు మొత్తం ఆర్ధిక వ్యవస్థలకు మూలాధారంగా నిలుస్తది. గుర్తింపు కోసం బలమైన భావన, శక్తి, భౌతిక వస్తువులు సమకూర్చుకోవడం లాంటి బలీయమైన కోర్కెలను సాధించే దిశలో మనుషులు భయాన్ని అధిగమిస్తరు. కోర్కెలను తీర్చుకోడానికి మనం పెద్దమొత్తంలో శక్తిని ఖర్చు చేయగల్గుతున్నము. కాస్మొటిక్‌ మరియు ఫ్యాషన్‌ రంగాల్లో ప్రజలు లైంగిక ఆమోదాన్ని కోరుకునేవారుగా చూపించబడతరు. కోరిక అనేది దురాశతో పోగేసుకోవాల్సిన అవసరంగా లేదా వ్యసనాలు వ్యామోహాలు మరియు తప్పనిసరి పరిస్థితులుగా రూపాంతరం చెందుతయి. ఇది ఒక బలమైన ఆకర్షణీయ క్షేత్రం అలాగే చాలామందికి చైతన్యం యొక్క ఆధిపత్య స్థాయి అవుతుంది. కోరిక వ్యసనాలతో ముడిపడి ఉండే స్థాయి. ఎందుకంటే కోరిక జీవితం కంటే చాలా ముఖ్యమైనది. కోరికలంటే వ్యసనాలు, మాదకద్రవ్యాలు, మధ్యపానాల వద్దే ఆగిపోకుండా గుర్తింపు కోసం ఆరాటం అపార సంపదలను పోగేసుకోవడం మరియు లైంగిక వెంపర్లాటలుగా కూడా రూపాంతరం చెందవచ్చు. ఒక కోరిక తీరనప్పుడు ఆ స్థానంలో మరో కోరిక వచ్చి చేరడం అనే తనకు తానుగా ఏర్పరుచుకునే ఉచ్చుల్లో ఒక భాగమైతది. ఇది ఎప్పటికీ సంతృప్తి చెందదు. ఎల్లప్పుడూ మరిన్ని వాటిపై ఆరాటం చెందుతూనే ఉంటదట్ల. ఏది ఏమైనప్పటికీ కోరిక అనేది లక్ష్యాలను సాధించే దిశగా స్పూరినిచ్చే ఒక పరికరంగా అయితే ఉపయోగపడతది. ఇది మనిషి యొక్క అంతర్గత ఎదుగుదలపై దృష్టి సారించినపుడు అది వ్యక్తి తాలుకు చైతన్యపు స్థాయిని ఉన్నతంగా పెంచనీకి దారితీస్తది. చైతన్య స్థాయి 150 : కోపం కోరిక యొక్క శక్తి క్షేత్రం తాను కోరుకున్నది పొందనందువలన నిరాశకి దారితీస్తది. ఆ నిరాశ కోపంగా మారతది. కోపాన్ని నిర్మాణాత్మకంగా వాడవచ్చు. లేదా విధ్వంసకరంగా ఉపయోగించవచ్చు. ఇది చాలాసార్లు ఆగ్రహం మరియు ప్రతీకార రూపాల్లో వ్యక్తీకరించబడతది. ఇది అస్థిరమైనది. అలాగే ప్రమాదమైనది కూడా. ఈ స్థాయిలో ఉన్న వ్యక్తులతో మాట్లాడేటప్పుడు భయమేస్తది. ఎందుకంటే ఆల్ల కోపంల ఎట్ల చెలరేగిపోతరో ఎవరికీ తెలియదు. కోపాన్ని నిర్మాణాత్మకంగా వినియోగించినప్పుడు అది సమాజ లేదా వ్యక్తిగత మార్పులకు ప్రేరణగా నిలుస్తది. కోపాన్ని ఉత్ప్రేరకంగా ఉపయోగించినపుడు అది పరిష్కారాలను అన్వేషించే సంకల్పం మరియు శక్తిలను అందిస్తది. అదే కోపాన్ని విధ్వంసకారిగా ఉపయోగిస్తే అది యుద్ధాలు మరియు హత్యలకు దారితీస్తది. కోపంలోనే జీవిస్తున్నప్పుడు ఆ కోపం పగ, కక్ష, కార్పణ్యం మరియు విద్వేషాలను రగిలిస్తది. ఈ పరిస్థితి ప్రమాదకరమైనది అలాగే విధ్వంసకరమైనది కూడా. ఇది మనిషి యొక్క జీవితాన్ని చాలా తీవ్రంగా నాశనం చేస్తది. ఈ స్థాయిలో ఉండేటోల్లు సంక్లిష్టంగా, తంపులమారిగా చికాకు కలిగించే వాల్లుగా మరియు విధ్వంసకర సన్నివేశాలకు దారితీసేవాల్లలా ఉంటరు. వీరు కోపాన్ని సంబాళించు కోవడంలో సమస్యలు కలిగిఉంటరు. వీరు చాలా సులభంగా మనస్తాపం చెందుతా ఉంటరు. తమకు అన్యాయం జరిగిన ప్రతీ విషయాన్ని తమ మనసులో డైరీలెక్క పదిలంగా ఉంచుకుంటరు. కోపం అనేది గర్వం కలిగి ఉన్నవారికి ఇతరులపై ఆగ్రహం, ద్వేషం మరియు పగలను ప్రదర్శించడం ద్వారా తమ స్వీయ విలువ భావాన్ని కాపాడుకోడానికి ప్రేరణగా ఉండే శక్తి యొక్క మూలక్షేత్రం. చైతన్య స్థాయి 175 : అహంకారం సంకుచిత మనస్తత్వ్తం కలిగి ఉన్నోల్లు, మాకెవ్వరూ ఏమీ నేర్పించక్కర్లేదు అన్న భావనతో ఉన్నోల్లు, ఎప్పుడూ తామే రైట్‌ అనిపించుకోవడానికి తమను సమర్ధించుకునేవాళ్ళు, కేవలం తమ గురించి మాత్రమే ఆలోచించే గర్విష్టులు, ఎవరు చెప్పినా వినిపించుకోని వాల్లు, తమకు తామే గొప్పని భావించేవాల్లు ఈ అహంకార స్థాయిలో ఉంటరు. వీళ్ళు తమ గురించి తాము ఈ దశలో ఎంతో పాజిటివ్‌గా భావిస్తరు. బాధ తాలూకు తక్కువ స్థాయిల్లోంచి అహంకార స్థాయికి చేరుకున్న ఫలితంగా ఆత్మగౌరవం అహంకారపు భావనలో మొదలైతది. తమ దర్పాన్ని, నైపుణ్యాలను ప్రదర్శించడం ద్వారా ఎదుటివాళ్ళను ఆకట్టుకునే ప్రయత్నం చేసేవాల్ల ప్రయత్నాల్లో అహంకారం ఉంటది. వారి మొహాలపై గర్వం తొణికిసలాడతది. తళుకు బెళుకుల వేషధారణలో వాల్ల అహంకార ప్రదర్శన ఉంటది. తమ తమ వస్తువుల ప్రదర్శన ద్వారా, తాము సాధించిన విజయాలను ఎంతో గొప్పవిగా అభివర్ణించడం ద్వారా, విజయోత్సాహాన్ని ప్రదర్శించడం ద్వారా, గతంలో వారు చేసిన యాత్రలను గొప్పలుగా చెప్పుకోటం ద్వారా, తమ పిల్లలు లేదా జీవిత భాగస్వామి సాధించిన విజయాలను చిలువలు పలువలుగా చేసి చెప్పుకోటం తమ అహంకారాన్ని బయటవెడ్తరు. ఈ స్థాయిలో ఉన్న వ్యక్తులు అభద్రత మరియు విచారాలు కలిగి ఉన్నప్పటికీ అహంకారం వాటిని బయటకి కనిపించనీకుండా చేస్తది. అహంకారం తమ జీవితం ఎంతో బాగుందన్న భావాన్ని బాహ్యంగా వ్యక్తపరచినప్పటికీ దాని వెనకాల అంతర్గతంగా దాచివెట్టినయి వాల్ల వ్యక్తిగత జీవితాన్ని గందరగోళంగా మారుస్తయి. అమెరికాలో ఉన్న మెరైన్‌ కార్ప్‌ సంస్థ తమ గొప్పలను చెప్పుకోవడం ద్వారా ఉద్యోగులను ఆకర్షించి వారిలో స్థైర్యాన్ని నింపే ప్రయత్నం చేస్తూ ఉంటది. సాధారణంగా సమాజంలో అహంకారం సానుకూలంగానే అంగీకరించబడ్తది.తమను తాము తరచి చూసుకునేంత వరకు ప్రోత్సహించబడ్తది. అహంకార స్థాయికన్నా దిగువన ఉండే స్థాయిలతో పోలిస్తే ఇది ఎంతో గొప్పగానే ఉంటది. అయితే అహంకార స్థాయి 200 కంటే తక్కువ ఉండటం వల్ల అవగాహనా స్థాయి బలహీనంగా ఉంటది. ఇక్కడ అహం పెరిగిపోయి సులభంగా దాడికి గురయ్యే దుర్బల పరిస్థితిలా ఉంటది. కావున ఒక్కోసారి ఇది అవమానం పొందే దిశగా నడుస్తది. అహంకారం ప్రదర్శించేవోల్లు చేసే తప్పులు వాల్లని ఒక్కోసారి తీవ్రప్రమాదంలోకి నెట్టేస్తవి. ఈ పతనాన్ని నిరోధించే ప్రయత్నంలో అహంకారం పొగరుగా, విభజించేదిలా, స్వీయరక్షణ మరియు దుర్బలత్వాలకు దారితీస్తది. ఇవన్నీ తిరస్కరణకు దారితీస్తయి. ఈ లక్షణాలు వ్యక్తిగత ఎదుగుదలకు ఏమాత్రం ఉపయోగపడవు సరికదా దానికి ప్రధానమైన అడ్డంకిగా నిలుస్తయి. ఈ స్థాయిలో మధ్యపానం లేదా ఇతర బలహీనతలు ఉంటే వాటి నుండి బయటపడటం ఎంతో కష్టసాధ్యం. ఎందుకంటే వారి భావోద్వేగపరమైన సమస్యలు మరియు వ్యక్తిత్వ లోపాలను అహం అంగీకరించదు. ఈ స్వభావం వారి పురోగతికి దోహదపడదు. గర్వం అనేటిది ఎప్పుడూ కాపాడుకోవాల్సి రావడంతో దానికి వాస్తవ శక్తిగాని, స్థాయిగాని, గౌరవం గాని ఉండదు. అహంకారమనేది అంతర్గత భయాలకు సంబంధించి ఉంటది. మనిషి ఒకసారి అహంకారాన్ని అనుభవించాక దాని నుండి బయటపడవచ్చు. అప్పుడు అతనిలోని భయం తదుపరి ఆకర్షక క్షేత్రమైన ధైర్యం వైపు ప్రయాణిస్తది. ఎప్పుడైతే మనిషి ‘‘శక్తి’’ తాలూకు స్థాయిల్లోకి ప్రవేశించిండో అతడి ఎదుగుదల క్రమేపీ వేగంగా పుంజుకుంటది. ఈ స్థితి తర్వాత నిజమైన హోదా, ప్రతిష్ట మరియు ఔన్నత్యాలను సాధించే అవకాశం ఉంటది. ఇది జరిగేవరకు మనిషి తన అహం తాలూకు బాధితుడిగా ఉండిపోతడు. తమ వైఫల్యాలకు బయట ఉన్న వాటిని నిందిస్తూనే ఉంటడు. ఈ స్థాయి తనకుతాను జవాబుదారీగా మారనీకి నిజమైన స్వీయబలోపేత, వ్యక్తిగత అభివృద్ధిని సాధించనీకి చిట్టచివరిగా ఉండే అవరోధంగా నిలుస్తది. అహంకారం ఆత్మగౌరవానికి ప్రతీకగా అప్పుడప్పుడు భావించినప్పటికి నిజమైన ఆత్మగౌరవం అహంకారాన్ని ఇడిచేసినంకనే వస్తది. అహంకారం అంతర్గత బలాన్ని పెంచదు సరి కదా భయాన్ని దుర్బలత్వాన్ని కలిగిస్తది. జీవనశైలి, దుస్తులు, తాము నడిపే కారు యొక్క బ్రాండు, పూర్వీకులు, తమ మతపరమైన అనుబంధాల వంటిని పరిరక్షించుకోనీకి అహంకారం తన శక్తిని ఉయోగిస్తది. ఇది ఎప్పుడూ తామెట్లా కనిపిస్తున్నమో ఇతరులు తమ గురించి ఎట్ల అనుకుంటన్నరో అన్న సోయిలోనే ఉంటది. ఇతరుల అభిప్రాయలపై ఎక్కువగా అధారపడే దుర్బల మనస్తత్త్వాన్ని కలిగి ఉంటది. ఒకసారి అహంకారం మనల్ని విడిచిపెట్టి పోయాక ఆ స్థానంలో నిజమైన అంతర్గత శక్తి చేరినప్పుడు మన ఇమేజిని కాపాడుకోవాల్సిన అవసరం పోతది. అప్పటివరకూ అహంకారం యొక్క ఆత్మరక్షణ దాడులకు అహ్వానించె లెక్కనే ఉంటది. తమ గురించి తాము సొంతంగా మంచిగ అనుకోలేని అభద్రతా భావంలో ఎప్పుడూ ఉండేటోల్లను అహంకారం కాపాడ్తనే ఉంటది. చైతన్య స్థాయి 200 : ధైర్యం జీవితం యొక్క సానుకూల అంశాలు ప్రతికూల అంశాలను అధిగమించడం మొదలైనప్పుడు ఈ స్థాయిలో మొట్టమొదట శక్తి పుడతది. ఈ స్థాయి నుండి మనం ధైర్యం మరియు ఉత్సాహాలతో మన ప్రపంచాన్ని అన్వేషించడం మొదలువెడతం. అన్వేషణ, విజయం, ధైర్యం మరియు సంకల్ప దీక్షలో సాగుతది. ఈ స్థాయి కన్నా దిగువ ఉండే చైతన్య స్థాయిలు నొప్పి, బాధ, దుఃఖాలతో నిండి ఉంటే ఇకనుండి జీవితం సవాలుగా మారి మనల్ని ఉత్తేజపరిచేదిగా మారడాన్ని గమనించగలుగతం. మనం పని చేసే పనుల్లో విజయం సాధించే కొద్దీ, బాధ్యతాయుతంగా వ్యవహరిస్తూన్న కొద్దీ మనం సాధించే ప్రతి విజయం క్రమేపీ ఆత్మగౌరవాన్ని పెంపొందిస్తుంది. నిరంతర స్వీయ రక్షణ అవసరమయ్యే ఆత్మగౌరవం అహంకారంలో కాక ధైర్యంలో ప్రతిబింబిస్తది. తద్వారా మనం సాధించుకున్న గౌరవ భావం మనతోనే ఉంటది. మొట్టమొదటి తెరచాపను ఎత్తిన మరుక్షణంలో ప్రయాణం ప్రారంభించినట్లే. ఈ స్థాయిలో మనకు ఇంతవరకు తెలియని జీవితాన్ని అన్వేషించగలిగే అంశాలు ఉత్తేజాన్ని నింపుకుంటయి. ఈ స్థాయిలో భయాలు ఇంకా ఉన్నప్పటికీ వాటిని అధిగమించే ధైర్యాన్ని కూడపెట్టుకోవాల్సిన అవసరం ఉంటది. మనకు అవసరమైన విద్యలను అభ్యసించడం, కొత్త ఉద్యోగం చేయడం, వృత్తిగత లోపాలను సరిదిద్దుకోవడం, ఎప్పటికప్పుడు మనల్ని మనం సమీక్షించుకోవడం ఇందులో భాగంగ ఉంటయి. ఒకప్పుడు తక్కువ స్థాయిలో ఉంటూ మనకు అవరోధంగా నిలిచిన అంశాలను ఇప్పుడు మనం ఒక సవాలుగా తీసుకుని అధిగమిస్తున్నం. మొదటిసారి మన జీవితానికి మనం మంచిగ సాయం చేసుకుంటున్నం. ధైర్యం మనలోని శక్తి యొక్క మూలాల్లోకి పోనీకి దోహదవడతది. ఇకపై మనల్ని మనం బాధితులగా భావించడం మానేస్తం. ఇకనుండి మన జీవిత అనుభవాలకు బాధ్యత వహించడం ప్రారంభిస్తాం. ఇది మనల్ని మనం బాగుచేసుకోవడంలో మొదటి దశ. ఈ దశలో మనకు మనమే ఓ పరిమితిగా నిలుస్తం. అహంకారం అంతర్గతంగా ఉండే భయాల వల్ల వస్తది. కావున మనలో ఏర్పడే ధైర్యం ఆ భయాలను ఎదుర్కొని వాటిని అధిగమించేలా చేస్తది. మన స్వీయ భావోద్వేగాలకు భయపడే బదులు వాటిని ఎదుర్కొనే ధైర్యాన్ని సంతరించుకుంటం. వాటిని నియంత్రించగలుగుతం. చిన్నచిన్న విజయాలు సాధిస్తున్న కొద్దీ మనలో పెరిగే ఆత్మవిశ్వాసం పెద్ద విజయాలకు దోహదపడతది. ధైర్యం యొక్క ఈ స్థాయిలో మనం సాధించగలిగేవాటిపై దృష్టి నిలుపుతం. దాంతో పాటు మన అవకాశాల ప్రపంచం కూడా విస్తరిస్తది. ఈ స్థాయిలో మొదట వ్యక్తిగత లబ్ధి ప్రేరణగా నిలిచినప్పటికీ క్రమేపీ మనం ఇతరులకు ఇవ్వగలిగే సామర్ధ్యాలను మనలో అభివృద్ధి చేసుకోగలుగుతం. చైతన్య స్థాయి 250 : సమస్థితి సమస్థితి విషయాల పట్ల అనుకూలంగా లేదా వ్యతిరేకంగా నిలిచే బదులు మనల్ని సమస్థితిలో ఉంచుతది. దీని కన్నా తక్కువ స్థాయిల్లో జనం విషయాల పట్ల బలీయమైన వైఖరి కలిగి ఉన్న కారణంగా ఆయా స్థాయిలు వ్యతిరేకతను, విభజనను ఎదుర్కోవాల్సి వచ్చేది. బలీయమైన స్థితి కలిగి ఉండాలి అనుకోవడం కోపం, నిరాశ, నిస్పృహలకు దారితీస్తది. కాబట్టి విషయాలను ఒక క్రమపద్ధతిలో ఉంచాల్సిన అవసరం ఈ స్థాయిలో మొదలయితది. ఫలితాల పట్ల బంధం లేకుండా ఉండగలిగినప్పుడు మనం ఇకపై బాధితులుగా ఉండబోము. ఈ స్థాయి చైతన్యంలో మనం అనేక బాధాకరమైన ఉద్వేగాలను విడుదల చేస్తూ ఉంటం. ప్రతిఘటనను విడనాడినప్పుడు మనిషికి మరింత శక్తి చేకూరుతది. బలమైన అభిప్రాయాలు అవరోధాలు, కష్టాలను ఎదుర్కొనేలా చేస్తవి. ఈ స్థితిలో మనం వాటిని ఈ విధంగా చూడడం మానేస్తం. ఇకపై విముఖత మరియు తాపత్రయాల ఆధిపత్యం నుండి శక్తికి తగినంత స్వేచ్ఛ లభిస్తది. ఈ స్థాయికి చేరుకున్నప్పుడు చక్కగా జీవించగల భావన, జీవితాన్ని నిర్వహించగల సామర్థ్యాలు మనలో సంతరించుకుంటయి. ఒకప్పటి భయం స్థానంలో భద్రత మరియు ఆత్మస్థైర్యం చోటుచేసుకుంటయి. మనం ఎటువంటి పరిస్థితినైనా నిర్వహించగలుగుతం. చైతన్య స్థాయి 310 : సుముఖత జీవితంలో ఒక చురుకైన పాత్రను పోషించడాన్ని ఈ స్థాయి సూచిస్తది. ఈ స్థాయిలో మన ఉద్యోగం చేయడమే కాక చేసే పనిలో ఉత్తమ స్థాయి ప్రయత్నాలు కూడా చేస్తాము. దీనివల్ల ఉద్యోగంలో పదోన్నతి మరియు అభివృద్ధిలు వేగంగా ఉంటయి. జీవితంలోని అన్ని పార్శ్వాల్లనూ ప్రగతి ఉంటది. సామాజిక మరియు ఆర్థిక విషయాల్లో విజయాలు వాటంతటవే లభిస్తయి. ఈ స్థాయిలో ఉన్న వ్యక్తి తక్కువ స్థాయి నుండి పని మొదలువెట్టి పై దిశగా పని చేయడానికి ‘‘సిద్ధంగా’’ ఉంటడు. నిరుద్యోగులైన వ్యక్తులు ఏ ఉద్యోగాల్లనైనా చేరనీకి ‘‘సిద్ధంగా’’ ఉంటరు. అంతర్గత స్వీయ విలువ మరియు ఆత్మ గౌరవం యొక్క స్థాయి అధికంగా ఉండడం వల్ల చిన్న ఉద్యోగాల్లో ఉన్నప్పటికీ చిన్నచూపు చూడబడరు. వారు తమ విలువలను, సహకారం అందించే సామర్థ్యాన్ని ‘‘తెలుసుకుంటరు’’. వారికి తరచూ అవార్డులు, రివార్డులు, గుర్తింపు, ప్రశంసలు అందించెటోల్లు ఇదే విషయాన్ని పలు సార్లు రూఢీగా చెప్పడం వల్ల ఆ సామర్థ్యం మరింత బలవడతది. చైతన్య స్థాయి 350 : సమ్మతి ఈ స్థాయికి చేరిన చైతన్యంలో మన స్వంత జీవితానికి మనమే సృష్టికర్త అని పూర్తిగా అంగీకరిస్తం. మన స్వీయ ఆనందానికి మనమే సృష్టికర్తగా తెలుసుకుంటము. ఇకపై అది ఎక్కడో ఉండదు. అది అంగీకరిచడానికి ఒక అపారమైన బాధ్యతతో కూడుకున్నదై దానితో పాటు స్పృహ మరియు చైతన్యంతో సమానంగా అదే స్థాయిలో ఒక పెద్ద శక్తి తాలూకు కుదుపుతో పాటు వస్తది. జీవితాన్ని మనం ఎలా కావాలంటే అలా సృష్టించుకోవడానికి మనకు మాత్రమే శక్తి ఉందని అర్ధం చేసుకోగల్గుతం. మనం మన ‘‘జీవితశక్తులతో’’ సామరస్యంగా జీవించడం ప్రారంభిస్తం. మనం ఈ అతి పెద్ద ఆవిష్కరణను అర్ధం చేసుకోవడం మొదలుపెట్టినం. సమస్యలను పరిష్కరించడంలో మరింత అవగాహన పొందడం ప్రారంభిస్తం. ఈ ఎరుక ఆలోచనా మరియు నిర్ణయాల్లో సమతుల్యత, సరైన నిష్పత్తి మరియు సముచిత తత్త్వాలను ఉపయోగించుకుంటది. ‘‘సరిjైునది’’ లేదా ‘‘తప్పు’’ అని నిర్ణయించడంలో మనకి ఆసక్తి లేనందువల్ల మనకు అన్ని పరిష్కారాల్లో ఉమ్మడి సామాన్య పరిష్కార దృష్టిపై కేంద్రీకరించల్గుతం. మన స్వీయ ఆనందాన్ని మనలోనే కనుగొనే మన సామర్ధ్యం గురించి పూర్తి అవగాహనతో ఉంటం. మన స్వంత పరిధిల గురించి చైతన్యంలోకి వస్తం. ఈ స్థాయిలో మనం ఏ విషయాన్నైనా సులభంగా అంగీకరించవచ్చు. దీనికారణంగా మనం పూర్తిగా తిరస్కరణను అధిగమిస్తం. మనల్ని మనం మరింత నిష్పాక్షికంగా చూడటాన్ని మొదలుపెడ్తం. ఈ స్థాయి ఎటువంటి వివక్ష మరియు అసహనాలు లేనిదై ఉంటది. మనం వైవిధ్యాలను గౌరవిస్తునే సమానత్వాన్ని గుర్తిస్త్తము. మనం ఉన్న పరిస్థితులతో సంబంధం లేకుండా మనకు ఆనందాన్ని కలిగించే పరిస్థితులను ప్రభావితం చేయగలుగుతం. ఈ స్థాయిలో శక్తి సంపూర్ణంగా ఉపయోగించబడడమే కాకుండా అది నిస్వార్ధ సేవ రూపంలో ప్రపంచానికి తిరిగి చెల్లించబడతది. ఇది ఒక వ్యక్తిని కారణం యొక్క చైతన్య శక్తి స్ఠాయికి చేరుస్తది. చైతన్య స్థాయి 400 : కారణం కారణం లేదా హేతువు యొక్క స్థాయి సైన్సు, వైద్యరంగం మరియు చరిత్రలో ఉన్న గొప్ప ఆలోచనా పరుల్లో ఉంటది. ఐన్‌ స్టీన్‌, సిగ్మండ్‌ ఫ్రాయిడ్‌, సుప్రీం కోర్టు న్యాయమూర్తులంతా ఈ స్థాయిలలో కారణం మరియు హేతువును అన్వేషిస్తరు. నిర్ధారిస్తరు. తెలివితేటలు మరియు హేతుబద్దతలు కలగలిసిన ఈ స్థాయిలో ఆధిపత్యాన్ని చెలాయిస్తాయి. దిగువ స్థాయిల్లో ఉండే సాధారణమైన, అసంబద్ధమైన భావోద్వేగాలకు సంబంధించిన వక్రీకరణలను అధిగమించడానికి ఇది తోడ్పడతది. ఈ స్థాయిలో మనం త్వరితగతిన వాస్తవాల ఆధారంగ సరైన నిర్ణయం తీసుకోగల సంక్లిష్టమైన సమాచార వ్యవస్థలను నిర్వహించగలుగుతము. సంబంధాలు, క్రమానుశీలతలు మరియు సూక్ష్మ స్థాయిలో ఉన్న వ్యత్యాసాల తాలూకు చిక్కులను అర్ధం చేసుకోవడం వల్ల గ్రాహ్యశక్తి మరియు సంభావ్యతలను అంచనా కట్టగల సామర్ధ్యం ఈ స్థాయిలో ఉంటుంది. కారణం యొక్క పరిణామంగా లక్ష్యాన్ని చేరుకోడానికి దోహదపడతది. హేతుబద్ధ స్థాయిలో సత్యం పట్ల ఎటువంటి భావోద్వేగాలు లేని గౌరవం ఉంటది. జ్ఞానం, వాస్తవాలు మరియు విద్య వ్యక్తి యొక్క స్థాయిని, విలువను పెంచడానికి ఉపకరిస్త్తయి. హేతుబద్ధత సాంకేతిక వాతావరణంలో తర్కం వాడబడే చోట ఎంతో ప్రభావశీలంగా ఉంటది. ఏది ఏమైనప్పటికీ అవగాహన యొక్క అత్యున్నత స్థాయిలను చేరుకోడానికి హేతుబద్ధత అవరోధంగా నిలుస్తది. ప్రతీ విషయాన్ని మేథస్సుతో మాత్రమే చూసే విషవలయంలో చిక్కుకుపోవడమనేది భారీ స్థాయిలో సమాచారం మరియు డాక్యుమెంట్లను ఉత్పత్తి చేస్తది. కానీ ‘‘విశ్వాసం’’లోనికి దూకడానికి అనుమతించే శక్తి హేతుబద్ధతలో లేనందువల్ల కారణం డేటా మధ్యలోనే చిక్కుకుపోయి ఉంటది. కావున ఇది ఆధ్యాత్మికత సత్యాలవైపు ఆత్మాశ్రయ ప్రవేశానికి అనుమతించదు. ఈ కారణంగా ప్రపంచంలో నాలుగు శాతం మంది మాత్రమే ఈ స్థాయిని దాటి పోగలుగుతున్నరు. ఇది గొప్ప ఆలోచనాపరులు, పాశ్చాత్య ప్రపంచంలోని గొప్ప గొప్ప గొప్ప పుస్తకాల స్థాయి. హేతుబద్ధత అనేది కేవలం మెదడు యొక్క తార్కిక సంబంధమైన పనితీరు మరియు వివరణలకు మాత్రమే పరిమితమై ఉంటది. ఈ స్థాయిలో భావోద్వేగాలు అణిచివేయబడి సమాచారం మరియు వాస్తవిక సత్యాల ప్రక్రియ మాత్రమే కొనసాగుతుంది. హేతుబద్ధత తనకు తానుగా సత్యాన్ని ప్రేమించగలిగే స్థాయికి చేరుకోగలిగినప్పుడు అది ప్రేమ యొక్క చైతన్య స్థాయికి తన ధృక్కోణవైఖరిని ఆ క్షణంలోనే మార్చుకోగలుగుతది. చైతన్య స్థాయి 500 : ప్రేమ ఈ స్థాయికి చేరుకునప్పుడు మనిషిలో ధృక్కోణంలో ఉన్నట్టుండి ఒక పెనుమార్పు సంభవిస్తది. ప్రేమ అనేది ఒక విభిన్న కోణంలో ఉంటది. ఇది క్రమానుశీలత లేని ఒక ఆత్మాశ్రయ ధోరణి కలిగి ఉంటది. ఈ స్థాయిలో తార్కిక మెదడుని పూర్తిగా దాటవేస్తూ అత్మచైతన్యంలోకి ప్రవేశిస్తము. ఉన్నతస్థాయి ఆధ్యాత్మిక ప్రభావాలు మొదటగా మెదడు ద్వారా హేతుబద్ధీకరణకు గురికాకముందే హృదయశక్తి ద్వారా వ్యక్తమవుతయి. ప్రేమకు ఉన్న గొప్ప గుణమేమిటంటే ఈ స్థితిలో ప్రేమ షరతులు లేనిదై, మార్పులకు గురి కానిదై, శాశ్వతమైనదై, క్షమాగుణం కలిగి పోషణ మరియు మద్దతు తెలపడం ద్వారా మొదలైతది. దిగువ స్థాయి ఎరుకల్లో ప్రేమ నిర్దేశంపబడినదై, ప్రత్యేకమైనదై, ఎంపిక చేయబడినదై, షరతులతో కూడుకున్నదై ఉంటుంది. ఈ స్థాయిని దాటి మన చైతన్య స్థాయి ఉన్నత దిశగా పయనించే క్రమంలో ఈ ప్రేమ షరతులు లేనిదిగా రూపాంతరం చెందుతది. దిగువ స్థాయిల్లో ‘‘పొందడానికి ఇవ్వబడే’’ ప్రేరణ ఆధారితమై షరతులని కలిగి ఉంటది. ఇది నిజమైన ప్రేమకన్నా మరొకరిపై ఆధారపడే స్థాయిలో ఉంటది. ఈ రోజున సమాజంలో ప్రాచుర్యంలో ఉన్న ప్రేమ అన్నది తీవ్ర శారీరక మరియు భావోద్వేగభరితమైన ఆకర్షణ, స్వాధీనత, ఆధారపడేది, నియంత్రణకు గురయ్యేది మరియు వ్యసనంగా ఉంటది. ప్రేమ ద్వేషంగా మారుతుందన్న వాస్తవం కారణంగా ఇది ‘‘నిజమైన’’ ప్రేమ కాబోదు. ఈ స్థాయిలో ప్రేమ ఒక జీవన శైలి అవుతుంది. ఒక విధానంగా జీవితపర్యంతం ఉంటది. ఇది మన ఉనికి నుండి ఉద్భవించే స్థాయి కాబట్టి బాహ్య ప్రభాలకు లోను కానిదై ఉంటది. ఈ ఆకర్షక క్షేత్రం యొక్క శక్తి కారణంగా ఈ స్థాయి కలిగిన వ్యక్తులు ఇతరులపై బలీయమైన ప్రభావం చూపించగలుగుతరు. వారిని ఉన్నతస్థాయికి చేరుకునేలా చేయగలుగుతరు. ఈ స్థాయి ప్రేమ అందరినీ, అందరి జీవితాలను కలగలుపుకొని ఉంటది కాబట్టి ఇది మానవుడి స్వీయ పరిమితులను దాటి ఉంటూ అవగాహనాస్థాయిని జీవితమంత విస్తరించేలా చేస్తది. ప్రేమ, మంచితనంపై మాత్రమే దృష్టి పెడుతూ ప్రతికూల ధోరణులను సైతం మంచిగ మార్చేయ్యగల శక్తి కలిగి ఉంటది. ప్రజలు ఈ స్థాయికి ఎదుగేకొద్దీ ఎవరినయినా కానీ ఎందుకైనా కానీ నిందించడం మానేసి జీవితాన్ని ఎలా ప్రేమించాలి అనే విషయం యొక్క నిరంతర అభ్యాసపూరిత అనుభవంగా చూస్తరు. ప్రేమ హృదయంలోంచి పుడుతుంది కాబట్టి మెదడు తాలూక మేధస్సు ద్వారా నియంత్రించబడలేదు. ప్రేమయొక్క ఉద్దేశ్యంలో ఉండే స్వచ్ఛత కారణంగా ఇది ఇతరులను నిరాశ నుండి బయటపడేసి వారు ఘన విజయాలను సాధించే విధంగా తోడ్పడతది. వాస్తవాలు మరియు సమాచారాలతో నిమిత్తం లేకుండా సమస్యలను ఒక ప్రాపంచిక దృక్పథంలో తక్షణ సహానుభూతితో చూడగల శక్తిని ప్రేమ కలిగి ఉంటది. ఈ స్థితిలో అహం తాలూక వేర్పాటు ధోరణి, విభజించే తత్త్వం, తీర్పులిచ్చే స్వభావాలనుండి బయటపడుతది. ప్రేమ అన్ని విషయాలనూ సంపూర్ణం చేయడానికి కృషి చేస్తది. ఇది నిజమైన ఆనందాన్ని అనుభవించగలిగే స్థాయిలో ఉంటుంది. ప్రేమ మనకు వెలుపల ఒక శక్తిగా ఉందని గ్రహించే క్రమంలో అదే ప్రేమ మనలో కూడా అనుభూతి చెందడం ద్వారా ఈ ఆనందం కలుగుతుంది. చైతన్య స్థాయి 540 : సంతోషం (షరతులు లేని ప్రేమ) హాకిన్స్‌ అంచనా ప్రకారం ప్రపంచ జనాభాలో కేవలం 0.4 శాతం ప్రజలు మాత్రమే 540 స్థాయికి చేరుకోగలిగిన్రు. ప్రేమ అనేది షరతులు లేనిదిగా మారడంతో అది ఒక నిజమైన ఆనందంగా అనుభూతి చెందడం ఈ స్థాయిలో ప్రారంభం అయితది. ఈ ఆనందం మనం నిర్వహించే అన్ని కార్యకలాపాలకు నిరంతరం తోడై ఉంటది. ఈ స్థాయిలో శక్తి క్షేత్ర చికిత్స జరుగుతది. ఇది 12 దశల సమూహాల స్థాయి అయి ఉంటది. ఈ స్థాయిలోని వ్యక్తుల సమక్షంలో ఉండటం ఆనందాన్ని కలిగించడమే కాకుండా వీరి నుండి వెలువడే శక్తి కాకుండా మనలోని ఒక ఉన్నత స్థాయి శక్తిని అనుభవంలోకి వస్తది. ఈ స్థాయిలో సాధువులు, ఆధ్యాత్మిక చికిత్స అందించేవారు మరియు ఆధ్యాత్మిక విద్యార్ధులు ఉంటరు. ఇక్కడ అపారమైన సహనం మరియు దీర్ఘకాలిక ప్రతికూల పరిస్థితులను ఎదుర్కోగల సానుకూల దృక్పథం యొక్క సామర్ధ్యం ఇమిడి ఉంది. కరుణతో కూడిన సామర్ధ్యం ఈ స్థాయిలో ప్రారంభమయితది. మనము శాశ్వతమైన మారని మూలంతో అనుసంధానించుకోవడం మొదలువెట్టినప్పుడు అంతరంగాల్లో ఆనందం, నిశ్శబ్దాలను అంతర్గతంగా తెలుసుకోవడం సంభవిస్తది. ఈ స్థాయి ముగింపు దశలో ప్రపంచం ఒక నిర్దిష్ట ప్రకాశాన్ని పొందుతది. ప్రతీదానిలో అందం కనిపిస్తది. సంకల్పం, ఉద్దేశం ఒకటే కావడంతో జీవితం ఏమాత్రం ప్రయాస లేకుండా సాగడం మొదలైతది. ఈ స్థాయిలో ఇతరులపట్ల బాధ్యతను తన స్వీయ చైతన్యం ద్వారా కలిగి ఉండడం జీవితాన్ని మరింత ఉన్నత స్థాయికి చేర్చుతది. మన శక్తి క్షేత్రం యొక్క అద్భుత శక్తిని ప్రతిఒక్కరు గ్రహించగలుగుతరు. అనేకమందిని ఏకకాలంలో ప్రేమించగల శక్తి కలిగి ఉంటం. ఇది కొనసాగుతూండగా మూలాన్నుండి అపరిమితంగా వెలువడే అపారమైన ప్రేమకు మనం ఒక వాహకంగా మారతాము. మరణానికి చేరువైన సందర్భాలలో మనుషులను ఇది 540 మరియు 600 మధ్య శక్తి స్థాయి వరకూ తీసుకెళ్ళగలదు. ఇది తాత్కాలిక అనుభూతి అయినప్పటికి వ్యక్తి తాలూకు జీవితాన్ని సమూలంగా మార్చి వేయగల సామర్ధ్యాన్ని కలిగిఉంటది. ఈ వాస్తవం మరణానికి సమీపంలో ఉన్న వ్యక్తుల్లో స్పష్టంగా కనిపిస్తది. ఒక్కసారి ఈ స్థాయికి చేరుకున్నాక ఓ కొత్త వాస్తవాన్ని అనుభూతి చెందగలుగుతరు. చైతన్య స్థాయి 600 : శాంతి ప్రజలు ఈ స్థాయికి చేరడం ఎంతో అరుదు. ఎందుకంటే ఈ శక్తి క్షేత్రం భావాతీతం, స్వీయ సాక్షాత్కారం మరియు దైవ స్పృహ వంటి వాటితో ముడిపడి ఉంటది. కోట్లాదిమందిలో ఒక్కరు మాత్రమే ఈ స్థాయికి సాధించగలుగుతున్నరు. 500 స్థాయి దగ్గర మొదలయ్యే కరుణ ఈ ఎరుక స్థాయి యొక్క ముఖ్య లక్షణంగా ఉంటది. క్షమాపణ అనేది మన క్షమాపణ తాలూకు అవసరం అని నిర్ధారింపబడిన తర్వాత ఇంతకు మునుపటి దశ కరుణ, క్షమా గుణాలను అధిగమించింది. ఎందుకంటే ఇక్కడ ఇకపై తీర్పులివ్వడమనేదే ఉండదు. ప్రజలు మనకు వ్యతిరేకమైన పనులు చేస్తున్నట్లు ఇక భావించలేము. ఎందుకంటె వారు వారి చైతన్య స్థాయికి అనుగుణంగా మాత్రమే ఉంటరు. ‘‘వాళ్ళకి బాగా తెలిస్తే మరింత బాగా చేసి ఉండేవారు’’, ‘‘వారు ఏం చేస్తున్నారో వారికే తెలియదు.’’ అని అర్ధం చేసుకోనికి ఇది కరుణను ప్రేరేపిస్తది. ఈ స్థితికి చేరుకున్నప్పుడు అవగాహన యొక్క నిర్దిష్ట కేంద్ర బిందువు ఉండదు కాబట్టి విషయం మరియు వస్తువుల మధ్య వ్యత్యాసం అదృశ్యమవుతది. ఈ స్థితిని అందుకున్న వ్యక్తులు ప్రపంచం నుండి తమకు తాముగా విడివడి ఉండడం అసాధారణమైనది కాదు. ఎందుకంటే బ్రహ్మానందం పొందుతున్న వాల్లకు ప్రపంచం వ్యర్థంగా అనిపించడం వల్ల దైనందిన కార్యకలాపాలకు దూరంగా ఉండచ్చు. వీరిలో కొంతమంది ఆధ్యాత్మిక గురువులుగా పిలవబడతరు. కొంతమంది అనామకులై సంచరిస్తూ ప్రజల అభ్యున్నతి కోసం పనిచేస్తుంటరు. మరి కొంతమంది తమ రంగాలలో అసాధారణ మేథావులుగా పేరుతెచ్చుకుంటరు. ఈ ఉన్నత దశ మతభావనకు అతీతంగా ఉంటది. ఎందుకంటే స్వచ్ఛమైన ఆధ్యాత్మికత అన్ని మతాలకు మూలబిందువు. ఈ స్థాయిలోని గ్రాహ్యశక్తియొక్క వాస్తవ అనుభవాన్ని వివరించడం కష్టసాధ్యం. ఇది నెమ్మదైన ఒక కదలికగా లేదా కాలం మరియు స్థలాన్ని అధిగమించిన విషయంగా అభివర్ణించబడ్డది. పరిణామం మరియు పదార్థం యొక్క నిరంతర ప్రవాహంలో ప్రతి ఒక్కటీ సజీవంగా మరియు ఎంతో ప్రకాశవంతంగా ఉంటుందనే భావన ఉంటుంది. మనసు తాను గమనించే ప్రకృతి దృశ్యంలో మమేకమై అనంత నిశ్శబ్దానికి చేరుతది. ఎందుకంటే ఇక్కడ దర్శిస్తున్నది, దృశ్యం ఒకటిగా చూడబడుతున్నయ్‌. అనంతమైన ప్రేమపూరితమైన, శాంతియుతమైన మరియు మరింత ధృడమైన శక్తి యొక్క ఉనికి ద్వారా ప్రతీదీ మిగతా అన్నింటికి అనుసంధానం చేయబడి ఉంటున్నది. చైతన్య స్థాయి 700 నుండి 1000 వరకు: జ్ఞానోదయం ఈ స్థాయికి చేరుకున్న చైతన్యం ప్రతీ తరంలో అతి కొద్ది మందికి మాత్రమే చేరుతది. చరిత్రలో కొందరు మాత్రమే దీనిని అందుకోగలిగిన్రు. ఇది ఉనికి యొక్క స్థాయిని దాటి ఎంతో దూరంలో ఉండడం వల్ల దీనిని వివరించడం కొంచెం కష్టమైతది. దీని నియమాలను అర్ధం చేసుకుంటం కూడా అంత సులభం కాదు. ఈ స్థాయిలో అసాధారణ శక్తి పుడతది. ఈ స్థితిలో చరిత్ర మొత్తంలోని అతి కొద్దిమంది దివ్యత్వాన్ని చేరుకునే దారిలో తమ అడుగుజాడలను ఇడిచిపెట్టిన్రు. అత్యున్నత స్థాయికి చేరిన వీరు యుగయుగాలుగా అనేక మందికి శక్తి వంతమైన ప్రేరణగా నిలుస్తున్నరు. వీరు సాధారణ వ్యక్తులుగా పరిగణించబడరు. మానవుల అత్యున్నత చైతన్యాన్ని ప్రదర్శించే అవతారాలుగా లేదా ప్రభువులుగా భావించబడతరు. వారి బోధనలు ఈ జ్ఞానోదయ స్థితికి చేరుకోవడానికి సూత్రాలను అందిస్తయి. ఇది మానవ శరీరం యొక్క అనుభవాలకు మించిన స్వఛ్ఛమైన చైతన్యాన్ని సూచిస్త్తయి. మనిషి రూపంలో మనం చేరుకోవాల్సిన చైతన్యంలో ఇది అత్యున్నత స్థితి. ఈ మహానుభావుల బోధనలు యావత్‌ మానవజాతి యొక్క సామూహిక చైతన్యాన్ని పెంపొందించడం ద్వారా యావత్‌ మానవాళికి ప్రేరణ అందిస్తయి. ఈ వ్యక్తులు తమ ఎరుకలో భాగంగా ఈ భూమిపై అనుభవించిన అన్ని జీవితాల గురించి తెలుసుకుంటరు కాబట్టి వారి గుర్తింపు శరీరంతో ముడిపడి ఉండదు. వారు సహజమైన వ్యక్తి యొక్క వ్యక్తిత్వ స్వభావాన్ని కలిగిఉండరు. ఎరుక యొక్క మూలస్థానంలొకి తిరిగి విలీనమైతరు. ఈ విలీనంలో వారికి అన్ని విషయాలు సంపూర్ణంగా బోధపడ్తయి. ప్రతీదానితో ఏకత్వ భావన కలిగి ఉంటరు. శరీరాన్ని చైతన్యాన్ని పొందే సాధకంగా మాత్రమే చూస్తారు. ఈ స్థాయికి చేరుకున్నాక శారీరకంగా వారేమీ నేర్చుకోనక్కర్లేదు. వారి చైతన్యం ఒక చోట ఉండిపోదు. అది ప్రతీచోటా సమానంగా విస్తరించి ఉంటది. చైతన్య స్థాయిని పెంచుకునే అవసరం ఏమిటి? ఈ విషయంలో మీ ప్రశ్నకు సమాధానం విస్పష్టంగా ఉంటది. మన ఆనందం మరియు శాంతిల స్థాయిని పెంచడానికి ఇది అవసరమయితది. అంటిపెట్టుకుని ఉండడం, తదుపరి స్థాయికి వెళ్ళడంలో ‘‘తదుపరి విషయం’’ మనకి ఆనందం కలిగిస్తుందనుకుంటం. సంఘర్షణలను తప్పించుకునే కొద్దీ శాంతి పెరుగుతుందనుకుంటం కానీ శాంతి మరియు సంతోషాలు మనసు యొక్క స్థాయిలు, ఇది వ్యక్తి తాలూకు బాహ్య పరిస్థితుల అనుభూతికి అందవు. అందువల్ల శాశ్వతమైన శాంతి, ఆనందాలు ఉన్నత స్థాయి చైతన్య స్థితిలో మాత్రమే పొందే వీలుంటది. ఎరుకలో మనం ఉన్నత స్థాయి సాధించేకొద్దీ అధిక శక్తి స్థానాలకు అనుగుణంగా మనల్ని సవరించుకుంట ఉంటం. ఇది మనలో అంతర్గతంగ ఉన్న ఆనందం మరియు సంతోషాలను కనుకొనేలా చేస్తది.

నిజ జీవితంలో ఒక సందర్భం: భర్త అలసిపోయి ఇంటికి వస్తాడు అతడికి అన్నం వడ్డించాలనుకుంటుంది భార్య. అప్పుడు వాళ్ళ ఇద్దరి మధ్య సంభాషణ. భార్య : “ అన్నం వడ్డించాను రండి” భర్త : “ఆకలి లేదు” భార్య : “ఎందుకు” భర్త : “ఆకలి లేదని చెప్పాగా”...
Inner Stability అంతర్గత స్థిరత్వం
దురాశ భార్య : మీరు తినకపోతే నాకెలా తినబుద్ది అవుతుందండి, నాకు కూడా తినాలని లేదులే...
అవగాహన భార్య : పోన్లెండి అక్కడే అన్నీ పెట్టాను, ఆకలయినప్పుడు తినండి.
సమృద్ధి భార్య : ఏవండీ.. ఎలా ఉండే వారు.. ఎలా అయిపోతున్నారో చూడండి.. సరిగ్గా టైం కి ఇంత తిండి తినచ్చుగా...
అంగీకారం భార్య : అరే... ఒంట్లో ఎలా ఉందీ...
కోపం భార్య : నా ఇష్టం వచ్చింది చేస్తా... నోర్మూసుకుని తినండి...
దురాశ భార్య : నేను వండింది అంతా బాగుందంటారు... పేరెట్టేది మీరే!...
భయం భార్య : ఎక్కడ తినొస్తున్నారో ... ఏమిటో...
Outer Equilibrium బాహ్య సమతుల్యత
4. Realising true Potential : (Happened Through me) భార్య : బాగా అలసిపోయినట్లున్నారు.. కలిపి ముద్దలు పెట్టేస్తా.. కాస్త లేచి తినెయ్యండి...
3. Transforming Response :(Happened As Me) భార్య : పోనీ ఉప్మా చెయ్యమంటారా.. జీడిపప్పు కాస్త వేసి.. నాక్కూడా తినాలనుందనుకోండి....
2. Reforming Response (Done by me) భార్య : పోనీ ఎలా వండితే నచ్చుతుందో చెప్పచ్చు కదా
1. Destroying Response (Done to me) భార్య : వడ్డించాక తినను అంటే ఎలా?. వండింది ఎవరి మొహాన కొట్టమంటారు?

ఆడియోలు

Inner Stability అంతర్గత స్థిరత్వం

జెన్ మాస్టర్ ఉమీజీతో డా||రెడ్డి సామ